Da etwas andre Jahresrückblick af guat bayrisch

Nix gibt´s, heia is doch bloß wieda soweit,
Mensch, Steffi, Weihnachtsfeier vom TuS is doch heit!

Mei, wei ho i des eitz bloß vergess´n kina,

Ja, des frog i mi a, hot bei dir ewa im Summa d´Sunna z´vüll g´schiena?

Owa, moment a mal, Marina, geit des überhapt, dass dei dou so einfach feiern,
hier bei uns im Bundesland Bayern?

Ja, sicher geit´s, wos glabst na du, her zou und pass amal af:
Ausflüg, Wettkämpf, Trainingslager, und und und, eitz schaust, ha, eitz bist baff!

Ja, is scho guat, du host ja Recht,
des Joa heia woa wirklich niad schlecht!
Mei, wou mia heia wieda überall woan, mei woa des vüll,
des glabt uns koana, wenn i des alles verzüll!
Woaßt as no, wei ma damals ins Palm Beach nach Stein g´fohrn san?,
a riesn Gaudi hams g´habt, uns´re Kloana, d´Rutschn zong´s in ihren Bann!

Fralle, woaß i des no, sowos vergisst ma doch niad,
vor allem wenn ma´s am nächsten Doch imma no im Kreiz drin g´spiad!
Ma glabt goa niad, wei anstrengend so a Doch sa ko,
und trotzdem macht´s Spaß und i denk heit no dro!
As Trainingslager in Fichtlberg derf ma owa a niad vergessn,
unsern Gast, an Daniel, und des grandiose Wettessn!

Stimmt, des woa wos, mim Michl, Volker, Ferdi und so,
dou denkt da Koch vo dou durt bestimmt heit no dro!
Und eiskolt woas und g´schneit hots a no g´habt,
as Bad woa grod im Umbau, owa trotzdem hots klappt!
Spiele ham ma a no g´macht, also an Unterhaltung is bestimmt niad g´leng,
eia san ma vor latter Lacha in da Eck drin g´leng!

Ja, schei war´s, mia ham owa desmal a a blöds Weda dawischt,
kolt woas, g´rengt hots, und d´Prominenz is a no an uns vorbei gezischt!
Und in da Nocht ham die Unsern a Mattnwagnfahrt wei d`Römer untanumma,
mit "Scho mal wos vo Nachtruhe g´hert?" is dann oana vo de G´scheidn daherkumma,
ja mei, ho i mir denkt, dou konnst du guada Mo a nix macha,
wal die Unsern doch bestimmt eh bloß driwa lacha!

Des mou ja richtig lustig g´wen sa, gell, dou hob i Recht,
owa TuS-Hüttn woa fei a niad schlecht!
D´Hüttn woa voll und uns´re Jungs woan in der Unterzahl,
owa trotzdem woas für sie koa riesen Qual,
im Gengteil, in Tierpark und ins Schwimmbad han´s mitananda spaziad,
i hob´s ja scho imma g´sagt, dass se bei uns imma guat verstandn wiad!
An bsondern Dank will i no an uns´re Köchinnen und Betreuer asrichtn,
sie woan einfach für alles dou, a um Uneinigkeitn wieda zu schlichtn!

Des g´freit mi, des lob i mir, wenn alles so guat ganga is,
und das mas niad vergessen, d´Radltour woa a schei, des is gwis!
As Weda woa einmalig, as Wasser im Deiblitzer Badesee woa kolt,
da Volker woa dann unfreiwillig a drin, obwohl er zerst niad wollt!
Unser Grillmeister, da Ralph hot uns dann no guade Würstln grillt,
und d`Sonnenanbeter hein beinah uns´re Wasserbombenspieler killt!
Leider woa unser Aufenthalt dou durt um einiges zu kurz,
und Christina, Franzi, Maxi und Volker beendetn diesn mit´m Radl-Sturz!

Ja, owa vo gewissn Regeln habt´s wohl a no nix g´hert?

Na, niad wirklich, i gib´s ja zou, a boamal woan ma scho richtig g´schert!
Owa grod des hot ja des G´spüll erst so richtig lustig g´macht,
Wasserballtore hots gem und da Marco hot uns dann no an richt´gen Ball dazoe bracht!

Schei, schei, schei! Und nou Großkotzenburg, äh, Großkrotzenburg han ma ja heia a wieda kumma,
und wou i ganz erstaunt woa, du host de ja desmal niad a mal mehr verschwumma!
Da Zeltaufbau woa zwar für alle a riesn Qual,
dabei woas doch goa niad as erste Mal!
Simone und ihre Lebensmittelanalysen durften natürlich nie beim Eikaffa fahln,
stellt´s eich vor, zum Schluss darat ma no fürs ung´sunde Essn zahln!
So, und wenn ma eitz no uns´re Gedankn a Stickl weida lenka,
kumm ma scho wieda zu am Traininslager, ohne grouß nouzudenka!

Ja, stimmt, des in Fichtlberg , nur woa des wirklich bloß für uns´ren junga Nachwuchs bestimmt!

Richtig, und es woa a koa Fehler, dass ma mal wos mit unsere Kloana unternimmt!
An mords Spaß ham´s g´habt, sogor in da Nocht woans no putzmunter und guat draf,
und die andern, wei da Michael und da Florian, standn dafür in da Frei um halwa viere wieda af!

Oa Zimma hams ja Quasselzimma g´nannt und i mou song, dou is echt wos dro,
denn ma konns kam verstei, wei jemand wei Belinda, Franzi oder Christina so vüll redn ko!
Und unser Oller woa ja einfach niad kaputt zu kreing und wollt no weida laffa,
bloß unser orma Ralph, der woa so fertig und konnt se einfach nimma dazou afraffa!

Und beim Wichtlspüll hams alle ganz brav mitg´macht und es woa so schei, i mou scho lacha,
wal koana Kostn und Meih g´scheit hot, um seim zu bewichtelndn a riesn Freid zu macha!

Ja, und oan Boum gibt´s, i konns da goa niad so beschreim,
der redt so vüll und konn nie so recht beim eigentlichn Thema bleim,
am meistn interessiert se da Dominik, so hoißt er, fürs Privatlem seiner Trainer,
du glabst des goa niad, owa mit da Jugend vo heute, des wiad imma scheiner!
Und zwoa so ganz raffinierte Damn, wei Steffi und Anja gits dann no,
dei kumma zwar ins Training, verstecka se owa während da Trainingszeit am Klo!
So, des woas, damit verabschied i mi, machtses guat, bis zur nächstn Feia!

Ja, halt amal Luft o, mia san ja no goa niad so weit, des woa no nie alles fir heia!
Unser Trainingslager in Zwiesel, des konn ma doch niad einfach wegloun, na sowos owa a,
vor allm, wei da Quietscher an Schlüssl drin stecka loan hot und da Maxi beinah asgflippt wa!
Dass ma so Spitzenkönner beim Kegeln woan, und leiwa beim Schwimma bleim solln,
wal Kegelprofi wern assichtslos is und nur da Helmut verstandn hot, dei Kugl richtig zu rolln!
Dass du und i so weng kocht ham, dass für uns nix mehr übrig bliem is,
dass da Maxi und da Michl nimma schwimma ham kina, weil´s Flirtn mit da Bademeistrin vüll scheiner gwen is!

Mei Gott, des konn ja oamal vorkumma, es tout ma ja a wahnsinnig leid,
ja, scho sigst as amal wieda, bin halt a scho nimma so g´scheid!
I woaß owa a no wos, a riesen Lob an unsern Trainer, Didi, der uns mit da Leine richtig zum Lacha bracht
und dessn Training wirklich sehr abwechslungsreich woa, des ham ma nämlich scho zum 3. Mal mitg´macht!

Und bei so vülln Wettkämpf san ma ja desmal a wieda zahlreich mitg´schwumma,
und i denk, mia san scho imma mit guatn Plätzen und ganz stolz af uns hoamkumma!
A boa vo uns han doch vo de Bezirksmeisterschaftn bis zu de Bayrischen vorgedrunga,
und a bei de Süddeitschen und de Deitschen doch ganz akzeptable Platzierung´n errunga!
I moan "Shaving session" nennt se da neue Geheimtipp uns´rer Profischwimma,
wei pfleng´s eitz nummal zu song: "Alle Haare runta und wia g´winna imma!"

Ja, stimmt, des san diese Methodn vom TuS, und, hey, woaßt as scho,
dass da Quietscher sein Start imma niad dawortn ko,
bei de Staffeln war a beinah af´n Markus drafg´sprunga,
i glab, des ham eam wahrscheinlich d´Engela vom Himml owa g´sunga!
Und wos natürlich bei koam Wettkampf falln derf, des woaßt scho,
no, anschließend da traditionelle Besuch bei unserm geliebtn McDo!
A wenn ma Stund´n nou oam soucha mein, des is uns völlig egal,
denn a Wettkampf ohne McDonald´s, des war wirklich fatal!

So, des woas owa eitz wirklich, i konn scho nimma,
eitz dank ma no allen fürs Mitwirka, wei imma,
Zeit wiad´s, mach´s guat, Marina, bis zur nächstn Weihnachtsfeia!

Bestimmt, Steffi, und du vergiss`s bittschön niad glei wieda, so wei heia!

Wia wünschen Eich no a scheine Weihnachtsfeia,
a scheins Fest, und a guats neis Joa,
Dann seng ma uns fei wieda, und zwar nächts Joa!