Von Mundartpreisträger Albert H. Keil

Vor hunnert Johr, wer wollt’s bestreide,
war’n noch die „gude alde Zeide“.
Die Mensche war’n so nett un friedlich,
ehr Läwe ä(n)fach un gemiedlich.
Do war noch Neggschdelieb un Ruh,
die Äärm weit uff un ‘s Schandmaul zu.
So denkt mer sich, doch weit ve’fehlt!
Wer sich dorch die Archive queelt,
dut sähne: Domols hänn die Lait
genauso g’hännelt schunn wie hait.

Un in dem Johr in Iggelbach
war grad der große Glockekrach,
kaum dass e naji Glock war g’stift.
Am liebschde hetten sich ve’gift
die zwä Veroine, wu sich g’stridde:
„Mit unsrer Glock werd do gelidde!“
Erscht ‘s Landgericht in Frankedaal
hot noot en(t)schiede: „‘s is egal,
vun wem die Glockegelder kummen.
‘s is wichdich, dass die Glocke brummen!“

Wie endlich Ruh war mit de Glocke,
dun siwwe Mann sich zammehocke.
Ehr Herz war rot, und links hot’s g’schlache,
sie wollden vieles besser mache.
Drum hänn se bei ‘me rode Woi
gegrind en naje Ortsveroi,
un die soziale Demokrade
vum ganze Dorf war’n oigelade.
Dass alle Lait ach werren wach,
heerts Gleckel mer vun Iggelbach.

Grad fuchzeh(n) Johr war richdich Friede
em Reich un Iggelbach beschiede.
Noot fangt de Erschde Weltkriech a(n),
un ball ach Iggelbach is dra(n):
Statts dass die Lait zum Bäde holt se,
werd zum Kanoneguss oig’schmolze
die Glock. De Kriech dut Wunne reiße,
Euroba dorchenanner schmeiße.
Vier Johr lang lang heert mer Waffekrach,
kä(n) Glock mäh lait in Iggelbach.

Uff aamem Feld wachst brauni Saat –
die Nazis woll’n die Macht im Staat.
Ganz vorne laaft en Raddefänger,
soin Raddeschwanz werd immer länger.
Er schafft’s mit soine Blutparole,
viel Lait zu sich ins Boot se hole.
Die erschde im KZ dun hocke
schunn, wie in Iggelbach drei Glocke
zum naje Kärchdorm ziechen um,
un zwelf Johr geh’n – statts dausend – rum.

Do is en Judd! Un der is rot!
Wer nät de Braune basst, is dot.
Noch korzer Zeit war’s still im Haus,
Jetzt traachen se de Kriech weit naus
nooch Frankreich, Belgie, Russland, Bole,
fär främme Länner sich se hole.
Die Nazis hänn zu frih gelacht,
die Rechnung uhne Wärt gemacht.
Am End hot’s uns an allem g’fehlt,
Die Glocke hänn die Not ve’zehlt:

Kä(n) Mensche, Esse, Geld un Sach,
kabuddes Haus, kabuddes Dach –
fascht alles jo die Bach war nunner!
Un dann bassiert e Wärtschaftswunner:
Die Daitsche hänn mit aller Kraft
schnell ausm Wääch die Trimmer g’schafft
un hänn – ich saach’s mol richdich laut –
färs goldne Ei e Näscht gebaut.
Schunn dun die Mensche widder singe,
in Iggelbach die Glocke klinge.

Dochs goldne Hinkel, wu is g’schluppt,
hot ball als Kratzbärscht sich en’puppt.
Weil jeder ‘m an die Fäddre will,
halt’s ums Verrecke nimmi still,
un weil die Lait dun weider robbe,
dut’s äwe ‘s Eierleche stobbe.
De äände määnt, soi Not wär groß –
soi Aktiepäckel drickt ‘n bloß!
De annre licht vor Kummer wach,
heert naachts die Glock vun Iggelbach.

Doch däss dun jetzt märr mol ve’gesse,
märr trinken was, dun orntlich esse,
märr feiren hunnert un sinn froh.
De wichdigscht Mann däss ach sieht so.
In Iggelbach den jeder kennt –
nät de Minischderpräsident!
Der muss zwar zimmlich Ärwet traache
un därf nooch mir glei äbbes saache,
awwer ‘n annre hot hait de Gällbaidel mit:
de Borjemääschder, de Helmut Schmidt!

*)
Festgedicht zur 100-Jahr-Feier
des SPD-Ortsvereins  Iggelbach/Pfalz  am 27. November 1999
mit Ministerpräsident Kurt Beck